“Largim me mirëkuptim”/ Vllaznia ndryshon para finales, shkarkon Plorin
Sërish ndryshim pankine te Vllaznia. Elvis Plori nuk është më trajneri i ekipit shkodran pas humbjes 3-1 ndaj kampionëve të Tiranës.
Me anë të një postimi në faqen zyrtare, klubi kuqeblu njofton ndarjen me trajnerin 43-vjeçar. “Klubi i Futbollit Vllaznia njofton se ka vendosur me mirëkuptim largimin nga pozicioni i trajnerit të parë Elvis Plorin.
Falënderojmë trajnerin Plori për të gjithë kontributin e dhënë gjatë këtyre 2 viteve për ringritjen e klubit tone dhe i urojmë shumë suksese ne sfidat e ardhshme në pozicionin teknik brenda klubit tonë”, lexohet në komunikatën e Vllaznisë.
Plori mori drejtimin e skuadrës shkodrane më 15 mars, duke zëvendësuar Thomas Brdaric. 11 ndeshje zgjati aventura e tij në krye të Vllaznisë, që më 31 maj luan finalen e Kupës së Shqipërisë ndaj Laçit.
