Las Palmas ndal Barçën, rihapet lufta për titull
Barcelona ka regjistruar një tjetër hap fals, këtë herë në transfertën ndaj modestëve të Las Palmasit, ku nuk ka marrë më shumë se një barazim 1-1. Me Coutinhon dhe Dembelenë në stol, Messi i dha avantazhin katalanëve, që në minutën e 21-të, duke dhënë idenë se çdo gjë do të jetë e lehtë për skuadrën e Valverdes.
Gjithsesi, Las Palmasi u impenjua maksimalisht dhe barazoi në fillim të pjesës së dytë, me anë të një 11-metërshi të ekzekutuar saktë nga Calleri, rezultat të cilin e mbrojti me fanatizëm deri në fund.
Edhe aktivizimi i Coutinhos, Dembelesë dhe Rakitiçit në pjesën e dytë, nuk prodhoi ndryshim për skuadrën e Barcelonës, që tani sheh t’i reduktohet në 5 pikë, distance me Atleticon ndjekëse dhe gara për titullin në La Liga, mund të konsiderohet tërësisht e hapur.
