Luftëtari, këmbanat e alarmit për shpërfytyrimin e pësuar
Maji 2018 do të mbahet mend gjatë për Luftëtarin, pasi gjirokastritët për herë të parë siguronin pjesëmarrjen në kompeticionet e UEFA-s. Dy fitoret radhazi, me Skënderbeun dhe Lushnjën kurorëzonin një sezon fantastik, që vetëm startin nuk e pati të tillë. 3 muaj më pas atij momenti magjik, Luftëtari është shpërfytyruar.
Largimet e Kristal Abazajt dhe Dejvi Bregut sigurisht që janë një minus i madh, por koha po tregon se drejtuesit ndoshta kanë gabuar edhe me lëvizjet në stafin teknik. Largimi i Hasan Likës dhe ardhja e sllovenit Milos Kostiç nuk ka sjellë efektin e duhur, përkundrazi, skuadra ka pësuar regres.
Dështimi në Europë është shoqëruar me humbjen në shtëpi ndaj Kastriotit në sfidën hapëse të kampionatit. I njëjti start si një vit më pare, kur skuadrën e drejtonte uruguaiani Luis Curbello, me Luftëtarin që kishte humbur identitetin. Me këtë ecuri skuadra ka humbur jo vetëm kreditet në fushë, por edhe mbështetjen e publikut, çka u reflektua të shtunën në debutimin sezonal, aty ku kurreshtja është më e madhe për të kuptuar se çfarë ekipi do të jetë deri në fund.
Luftëtari i këtij sezoni nuk duket më ai ekipi i frikshëm, të paktën për momentin. Një humbje e tillë është një goditje e madhe në aspektin psikologjik dhe në një garë të egër vështirë që mund të ngrihesh pa patur reflektimin e duhur. Këmbanat e alarmit për këtë shpërfytyrim të gjirokastritëve kanë rënë me kohë, teksa mbetet për t’u parë nëse ekipi do të dijë të reagojë pa ndonjë ndërhyrje nga drejtuesit më të lartë.
