Lyon përfiton nga lufta në Ukrainë, merr në huazim mesfushorin e talentuar brazilian
Lufta në Ukrainë vijon prej më shumë se një muaji dhe pikërisht për këtë shkak, FIFA ka ndërhyrë për të nxjerrë një vendim që lejon futbollistët e klyibeve ukrainase të federohen në kampionate të tjera të paktën deri në fund të sezonit.
Nga kjo ka përfituar maksimalisht Lyoni në kampionatin francez, që pasditen e sotme ka njoftuar akordin me brazilianin Tete, i cili ka qenë pjesë e Shakhtar Donetsk.
Mesfushori anësor Tete do të jetë nën urdhërat e trajnerit Peter Bosz deri në fund të këtij sezoni dhe më pas pritet të rikthehet sërish te Shakhtar, nëse situata në Ukrainë do t’i rikthehet normalitetit.
Tete, i cili muajin e kaluar festoi ditëlindjen e 22-të, u kontaktua edhe nga disa klube angleze, por në fund zgjodhi Lyonin për të vijuar karrierën deri në fund të sezonit.
