Man. United shfrytëzon opsionin e rinovimit të kontratës me De Gean
David De Gea është përfolur gjithmonë se do të largohej nga Manchester United, madje përpara 2 vitesh, transferimi i tij tek Reali i Madridit dukej fakt i kryer, por një problem burokratik ndaloi gjithçka, e në këtë mënyrë ai qëndroi në “Old Trafford”.
Kontrata e portierit spanjoll skadon në vitin 2019, por “Djajtë e Kuq” kanë një opsion rinovimi për 1 vit, të cilin kanë ndërmend ta shfrytëzojnë për të mos lejuar largimin e 27-vjeçarit. Tek mediat angleze flitet se ka pasur bisedime mes palëve, ku paga e ofruar nga United përflitet të jetë 375 mijë paund në javë.
Gjithsesi De Gea nuk ka nënshkruar ende të zezën mbi të bardhë, dhe klube si PSG, Barcelona e përsëri Real Madrid po mbajnë nën vëzhgim situatën e tij. Me kohën kundër tyre, ekipit nga Manchesteri po i soset durimi dhe i kanë vendosur afat portierit të tyre, për të marrë një vendim përfundimtar.
Nëse nuk do të ketë një marrëveshje deri në janar, ata do të shfrytëzojnë opsionin për rinovimin e kontratës me 1 vit. Kohët e fundit, problemet nuk kanë pasur të sosur tek skuadra e Mourinhos, me shumë lojtarë si Pogba, Martial apo Bailly që kanë kërcënuar me largim, në rast se trajneri portugez do të qëndrojë në “Old Trafford”.
