Ndaj Kastriotit më i motivuar se kurrë, Redon Xhixha synon rekordin unik
Redon Xhixha po kalon momentin më të bukur të karrierës. Sulmuesi laçian është përshtatur për mrekulli te Tirana që në sezonin e parë. Deri tani 13 gola dhe 6 asiste në Superiore, dhe katër gola të tjerë në Kupën e Shqipërisë.
23-vjeçari ka formuar një dyshe të frikshme me Taulant Seferin në ofensivën e 25 herë kampionëve të Shqipërisë, të cilët po dominojnë kampionatin këtë edicion dhe titulli është vetëm çështje kohe.
Në ndeshjen e radhës me Kastriotin, Xhixha ka një mision të veçantë për të arritur një rekord të pazakontë. Goleadori kurbinas u ka shënuar të gjitha ekipeve të Superiores këtë edicion, duke përjashtuar skuadrën krutane.
Kukësit, Laçit dhe Egnatias, goleadori kurbinas u ka shënuar nga dy gola, ndërsa nga një herë ka ndëshkuar Partizanin, Vllazninë, Teutën dhe Skënderbeun, ndërsa “viktima” e preferuar është Dinamo, rival ndaj së cilit ka festuar plot tre herë.
Të dielën ndaj Kastriotit do të ketë një motiv akoma dhe më të madh për të gjetur rrugën e rrjetës, për të kompletuar këtë rekord të veçantë dhe të bukur. Një arsye më shumë që dhe shokët e skuadrës të tregohen më altruist me Xhixhën, i cili synon të arrijë një statistikë tepër të rrallë.
Sulmuesi i majtë në edicionin më të mirë ka shënuar 12 gola me Laçin në sezonin 2019-2020, shifër të cilën e ka kaluar që në 29 javë kampionat me Tiranën, teksa ka ende mundësi të përmirësojë statistikat personale, por në fillim do të tentojë të ndëshkojë ekipin krutan.
