Ndoj: Nuk mendoj për merkaton, po pres me padurim debutimin në kombëtare
Nga grumbullimi i kombëtares shqiptare në Zvicër, mesfushori i Brescias Emanuele Ndoj i bëri një bilanc sezonit të tij në aspektin personal.
“ Ky sezon ka qenë shumë i mirë për mua në aspektin personal. Kam luajtur të gjitha ndeshjet e kampionatit, e kam mbyllur mirë këtë sezon. Brescia arriti të siguronte mbijetesën dhe jam i lumtur për këtë”.
Sirenat e merkatos kanë nisur të dëgjohen, por Ndoj për momentin mendon vetëm për Brescian dhe le gjithçka në dorë të klubit.
“ Për merkaton unë sdi asgjë, jam nën kontratë me Brescian dhe mendoj vetëm për këtë klub. Kam edhe 2 vite kontratë me Brescian dhe mendoj vetëm për skuadrën për një largim të mundshëm timin vendos klubi”.
Ndoj kërkon ta shfrytëzojë këtë mundësi dhe ndryshe nga herën e parë tashmë synon edhe debutimin me kombëtaren kuqezi në dy miqësoret e radhës ndaj Kosovës dhe Ukrainës.
“ Është një ëndërr të jem këtu me kombëtaren e madhe. Është trajneri ai që vendos se kush luan. Unë jam i gatshëm dhe në momentin që trajneri do të ketë nevojë për mua, do të mundohem të jap më të mirën time në fushë”.
Mesfushori i dalë nga akademia e Romës e pranon se në këtë fazë të sezonit lojtarët nuk janë në gjëndjen e tyre më të mirë fizike.
“ Kemi bërë shumë ndeshje jemi të ngarkuar fizikisht, prandaj duhet pak kujdes në këto dy sfida, por gjithsesi ne do të japim maksimumin për të marrë rezultate pozitive”.
