Një brazilian i frikësohet Argjentinës: Pse janë favoritët kryesorë në Katar
Botërori Katar 2022 po afron dhe Rivaldo i ka idetë e qarta në lidhje me Kombëtaren favorite. Legjenda braziliane, i cili fitoi “Topin e Artë” (1999) dhe Kupën e Botës (2002), zgjedh Argjentinën si kandidaten kryesore për triumfin në turneun që do të zhvillohet në periudhën 20 nëntor-18 dhjetor.
Kombëtarja albiceleste po kalon një moment shumë të mirë dhe në triumfin 3-0 ndaj Hondurasit regjistroi ndeshjen numër 35 pa humbje. Disfata e fundit e Argjentinës ndodhi në 3 korrikun e vitit 2019 ndaj Brazilit (2-0).
“Duke u bazuar te ndeshjet e fundit, unë shoh Argjentinën në formë të shkëlqyer, kjo edhe falë fitimit të Kupës së Amerikës vitin e kaluar, kështu që ne duhet t’i marrim seriozisht në Katar. Skuadra demonstron siguri edhe në prapavijë.
Lionel Messi aktualisht po bashkëpunon mirë me shokët e tij të skuadrës, gjë që e bën lojën e tij më të thjeshtë. Ky Botëror mund të jetë i fundit për Leon, kështu që Argjentina do të konkurrojë për fitimin e trofeut.
Nga skuadrat evropiane nuk përjashtoj nga favoritet Spanjën, Gjermaninë dhe Francën, pasi janë Kombëtare që kanë lojtarë të mëdhenj dhe një histori të pasur”, deklaroi Rivaldo.
