Sergio Ramos: I lumtur për debutimin, dua të lë shenjë te PSG!
Debutim ëndrrash për Sergio Ramos me fanellën e PSG. Pas një kohe të gjatë mbrojtësi spanjoll u rikthye në fushë që nga minuta duke debutuar me skuadrën e Pochettinos dhe duke luajtur për 90 minuta në transfertën ndaj St Ettiene ndeshje të cilën kryeqytetasit e fituan me shifrat 1-3. Ramos foli pas ndeshjes duke komentuar me doza të larta optimizmi debutimin e tij.
“Është një ndjenjë e veçantë. Jam shumë i lumtur dhe i kënaqur. Është një ditë shumë e veçantë për mua pasi kalova shumë kohë pa luajtur. Është e rëndësishme që kam ndihmuar ekipin, të jem këtu me grupin dhe të kem luajtur 90 minuta, është diçka e madhe në këto momente”, tha fillimisht Sergio Ramos.
“Bëmë paraqitje të mirë, fituam 3 pikët dhe po largohemi me fitore. Ne duhet të vazhdojmë në këtë rrugë dhe të vazhdojmë të punojmë. Ndihem mirë në fushë me shokët e skuadrës. Gjithçka shkoi mirë në këtë ndeshje të parë, me kalimin e kohës do të njihemi edhe më mirë dhe kjo do të na japë akoma më shumë forcë në fushë”, deklaroi në fund të fjalës së tij Sergio Ramos.
