Shehi me mision, Skënderbeu ndaj Laçit për vazhdimësinë!
Lajmet e mira që vijnë nga gjyqi me UEFA-n sjellin entuziazëm tek Skënderbeu që pavarësisht se nuk është njohur me vendimin zyrtar të CAS-it, kërkon më parë të bëjë detyrat e shtëpisë, duke siguruar zonën europiane nëpërmjet kampionatit. Korçarët kanë treguar oshilacione të shumta, duke befasuar me paraqitjet e tyre pas atij starti të zjarrtë të edicionit. Në Laç kampionët shkojnë me pretendime të mëdha, një fitore do të konfirmonte objektivat e skuadrës së Orges Shehit dhe mbi të gjitha do të sillte frymën e duhur për të përballuar sprintin final të kampionatit.
Ndaj kurbinasve kërkohet vazhdimësia por mbi të gjitha rigjetja e fitores në transfertë, të cilat janë kthyer në tabu. Për herë të fundit korçarët kanë fituar larg tifozerisë së tyre në Selman Stërmasi ndaj Partizanit, më 29 tetor të 2018-ës periudhë në të cilën po kalonte një formë të jashtëzakonshme. Që nga ajo sfidë janë luajtur edhe 9 transferta të tjera në të cilat Skënderbeu ka marrë vetëm dy pikë falë barazimeve në Selman Stërmasi ndaj Tiranës dhe Niko Dovana ndaj Teutës.
4 janë golat e shënuar në këto 9 transferta, duke bërë që Skënderbeu të shfaqet i brishtë larg shtëpisë. Por mbi të gjitha kampionëve i mungon vazhdimësia, pasi dy ndeshje pa humbje mungojnë që nga nëntori i 2018-ës, ku fitorja e shtëpisë ndaj Flamurtarit u shoqërua me barazimin ndaj Tiranës. Ndërkohë që dy fitore radhazi mungojnë prej fundit të tetorit dhe fillimit të nëntorit, ku fitorja ndaj Partizanit në Selman Stërmasi u pasua nga fitorja në shtëpi me Kastriotin. Pikërisht vazhdimësia kërkohet edhe ndaj Laçit, pasi vetëm në këtë mënryrë Skënderbeu mund të sigurojë vendin në zonën europiane nëpërmjet kampionatit.
