Shuhet ëndrra e Flamurtarit për të marrë Caleb Ekuban
Caleb Ekuban zbarkon në Turqi, për të luajtur me skuadrën e Trabzonsporit, që militon në elitën e futbollit turk. Pasi doli jashtë planeve të trajneri argjentinas Marcelo Bielsa, 25-vjeçari me origjinë nga Gana, por me pasaportë italiane, është kërkuar nga disa klube në Turqi, por oferta e Trabzonsporit duket se ka qenë më bindëse.
Bie poshtë çdo mundësi e kthimit të sulmuesit në Superiore, ku së fundmi e kërkonte me ngulm Flamurtari. Administratori i kuqezinjve, Sinan Idrizi, e pranoi në “Zona Gol” se i kishte ofruar sulmuesit gjysmën e pagës që përfitonte te Leeds United dhe se priste deri në ditët e fundit të gushtit përgjigje, por duket qartë se e ardhmja e futbollistit nuk do të jetë në Shqipëri.
Caleb Ekuban u aktivizua për një sezon te Partizani (2016-2017), i huazuar nga Chievo, por në verën të 2017-ës klubi italian e shiti te Leeds United për 500 mijë euro. Me të kuqtë shënoi 17 gola në 34 ndeshje të Superiores.
