Spalletti thërret, drejtuesit përgjigjen; Interi merr nënkampionin e botës
Vetëm pak orë më parë Luciano Spalletti u dërgoi një sinjal të qartë drejtuesve të skuadrës, se ka nevojë edhe për të paktën dy lojtarë, që të ndërtojë një skuadër konkurruese si në Itali, ashtu edhe në Europë.
Duket se ngritja e zërit nga ana e trajnerit nuk ka rënë në vesh të shurdhët, pasi kanë reaguar menjëherë drejtuesit e Interit, duke i sjellë njërin nga lojtarët që Spalletti dëshironte.
Zikaltrit kanë mbyllur marrëveshjen për të sjellë në Milano nënkampionin në fuqi të botës, kroatin Sime Vrsaljko, i cili në dy sezonet e fundit ka qenë pjesë e Atleticos së Madridit.
Marrëveshja parashikon një huazim një vjeçar me 6.5 milionë euro dhe të drejtë blerjeje në fund të sezonit, për 17.5 të tjera, duke e vlerësuar kartonin 24 milionë euro në total.
Me ardhjen e Vrsaljkos, Spalletti sistemon plotësisht krahun e djathtë të mbrojtjes, ku ishte krijuar boshllëku me largimin e Joao Cancelos, ndërsa në gjirin zikaltër shtohet numri i kroatëve, dhe shkon në tre lojtarë tashmë.
Emri tjetër që Spalletti u ka kërkuar drejtuesve të skuadrës, është ai i Arturo Vidalit, që ka prishur raportet me Bayernin e Mynihut dhe ka mbetur jashtë skuadrës. Edhe këtu palët duket se janë shumë pranë dhe brenda javës pritet të ketë të reja të rëndësishme.
