Suarez gabon penalltinë, Peruja eliminon Uruguajin dhe kalon në gjysmëfinale
Peruja ka bërë surprizën në fazën çerekfinale të Kupës së Amerikës, duke mposhtur dhe eliminuar Uruguajin, në një sfidë që u vendos nga goditja e 11-metërshave, dhe duke siguruar kalimin në gjysmëfinale.
Koha e rregullt përfundoi në barazim pa gola, ndonëse Uruguaji u shfaq shumë më kërkues dhe krijoi disa mundësi shënimi, veçanërisht me Cavanin, teksa topi përdundoi 3 herë në rrjetën e portës së Perusë, por golat u anuluan për pozicion jashtë loje.
Nga ana tjetër peruanët u mbrojtën me forca të shumta dhe luftuan për çdo top, duke treguar shpirt të lartë gare, ndërsa vazhdimisht tentonin të qarkullojnë topin, për të fituar kohë.
Trajneri i Uruguajit, Oscar Tabarez bëri të gjitha lëvizjet për ta fituar takimin brenda 90-minutëshit, duke aktivizuar edhe sulmuesin Stuani, por shifrat e rezultatit mbetën të pandryshuara dhe skuadrat iu drejtuan 11-metërshave.
Penalltinë e parë e mori përsipër sulmuesi uruguajan i Barcelonës, Luis Suarez, por goditja e tij u grushtua nga portieri Gallese, i cili u dha zemër peruanëve.
Të gjitha penalltitë e tjera më pas, u ekzekutuan saktë duke përfunduar në rrjetë, ndërsa në fund festa ishte e gjitha për peruanët, që kaluan në gjysmëfinale, ku do të përballen me Kilin më 4 korrik, në orën 2:30 të mëngjesit.
