Suso ndez Milan-Juve: Nëse shënoj shkoj në shtëpi në këmbë
Pas disa rezultateve negative radhazi, Milani u rikthye te fitorja në Serie A, këtë mesjavë, pasi arriti të mposhte me rezultatin 4-1 Chievon në transfertë. Tashmë rradhën e ka Juventusi. Misioni për të bërë një figurë të mirë të shtunën në San Siro ndaj bardhezinjëve nuk do të jetë aspak i thjeshtë për skuadrën e Montellës. Megjithatë një nga lojtarët më në formë te Milani në këto momente, Suso, është optimist për vazhdimësinë e sezonit të Milanit. Autori i golit të parë në fitoren ndaj Chievos theksoi se është shumë e rëndësishme që kuqezinjtë të mos humbasin përballë bardhezinjëve. “ Deri tani kemi qenë të bllokuar por mendoj se kthesa ka ardhur, do të jetë e rëndësishme të mos humbasim ndaj Juves. Nëse i shënoj Buffonit? Do ta bëj rrugën në këmbë deri në shtëpi”, deklaroi spanjolli i cili shtoi gjithashtu se edhe nëse Milani nuk kualifikohet në Champions League ai do të qëndrojë gjatë te kuqezinjtë.
