Takimi për të ardhmen e Lewandowskit, palët me qëndrime të kundërta
Menaxheri i Robert Lewandowskit, Pini Zahavi, dhe përfaqësuesit e Bayernit u takuan këtë të enjte në Mynih. Siç ka mësuar “El Mundo Deportivo”, ideja e përfaqësuesve të lojtarit ishte që t’i përcilleshin skuadrës gjermane synimet e polakut për t’u larguar këtë verë drejt Barcelonës, ndërsa drejtuesit e klubit gjerman shkuan me synimin për t’i ofruar rinovimin.
Përfaqësuesi i sulmuesit polak, i cili vepron edhe si ndërmjetës i Barcelonës, ka dashur të dijë qëllimet e skuadrës gjermane në lidhje me çmimin e shitjes së lojtarit. Megjithatë, nuk ka pasur asnjë progres, pasi Bayern i ka thënë se nuk dëshiron ta shesë Lewandowskin, kontrata e të cilit me bavarezët skadon në qershor 2023.
Sipas gazetës “Bild”, në takim morën pjesë drejtori sportiv i Bayernit, Hasan Salihamidžić dhe shefi ekzekutiv, Oliver Khan. Gazeta gjermane shton gjithashtu se janë planifikuar takime të tjera mes dy palëve.
