Tirana fiton derbin me Partizanin
Derbi i madh i kryeqytetit mes Tiranës dhe Partizanit i mungon futbollit, megjithatë është i pranishëm dhe po dhuron emocione në basketbollin e meshkujve. Sfida e zhvilluar në pallatin e sportit “Asllan Rusi” mes dy rivalëve të përjetshëm u mbyll me triumfin e bardhebluve që për hapësirën më të madhe kohore e dominuan takimin
Ne fillim të periodës së parë ishin të besuarit e trajnerit grek Dukas, më të saktë, megjithatë në fragmentet përmbyllëse Partizani forcoi mbrojtjen dhe arriti që ta barazonte takimin me rezultatin 18-18. Në segmentin e dytë Tirana filloi të krijonte diferencën që do të rezultonte vendimtare.
Shkëputja e Tiranës u zgjerua edhe më shumë në fraksionin e 3-të, duke e bërë të parikuperueshme distancën për demat. Perioda përmbyllëse ishte thjesht një administrim nga ekipi i Antonios Dukas.
Të kuqtë ishin krejtësisht të pafuqishëm për t’iu kundërvënë lojës së basketbollistëve të Tiranës, që të udhëhequr nga kapiteni Erkand Karaj, e mbyllën këtë derbi me fitoren e thellë 88-68. Suksesi i 12-të në këtë kampionat për bardheblutë, të cilët vijojnë të kryesojnë dhe me të drejtë konsiderohen si skuadra favorite për të fituar titullin kampion.
