Trashi nuk stërvitet as me Partizanin B, shqetësojnë edhe Hoxha e Telushi
Është vetëm ndeshja e parë e fazës së dytë, por duket se ka marrë përmasat e një finaleje supersfida e ditës së hënë mes Partizanit dhe Skënderbeut. “Demat”, të cilët kanë zhvilluar një fazë të parë thuajse të përsosur, ku kanë regjistruar 7 fitore, një barazim dhe vetëm një humbje, kjo e fundit pikërisht kundër korçarëve, po vijojnë përgatitjet me synimin për t’i marrë maksimumin përballjes.
Lorenc Trashi nuk ka qenë i pranishëm në seancën stërvitore dhe në formë ndëshkimi për sjelljen e tij pas ndeshjes me Luftëtarin, duhej të përgatitej me skuadrën e dytë, por sipas informacioneve 26-vjeçari nuk ka qenë i pranishëm në stërvitjen e Partizanit B. Nuk është e qartë nëse gramshioti do të përfshihet në listën e lojtarëve të gatshëm për duelin kundër kampionëve, por gjasat janë të shumta që ai të qëndroj jashtë dhe nëse kjo ndodh, vendin e tij mes titullarëve do ta marrë Kalari.
Kapiteni Alban Hoxha është në luftë me kohën. Tërheqja e ligamentit të jashtëm në gjurin e djathtë kërkon të paktën 3 javë, por gardiani ka djegur etapat dhe së bashku me stafin mjekësor po bën maksimumin për të qenë në fushë të hënën. 31-vjeçari është stërvitur i diferencuar, nëse nuk ia del, kuadrati do t’i besohet sërish Dashamir Xhikës. Bruno Telushi ka vijuar të stërvitet veçmas grupit për shkak të një shqetësimi në zonën e pasme të gjurit.
Mesfushori i cili këtë sezon ka qenë një ndër lojtarët më produktiv tek të kuqtë pritet të rikuperohet për supersfidën ndaj bardhekuqve. I pranishëm ka qenë drejtori sportiv Olsi Rama, i cili ka ndjekur nga pranë të gjithë seancën stërvitore duke biseduar shpesh herë me trajnerin Skënder Gega. Ndërkohë stërvitja u parapri nga një veprim i veçantë i lojtarëve të kuq, të cilët i dhuruan lojtarëve të akademisë librin mbi jetën e një legjende si Refik Resmja në mënyrë që të kuptojnë edhe më mirë se çfarë do të thotë të përfaqësosh një klub kaq të madh si Partizani.
