Trepça ’89 në krizë rezultatesh, merret vendimi për trajnerin Magani
Skuadra nga Mitrovica, Trepça ’89 nuk po kalon një moment aspak të mirë këtë sezon, pasi në 6 javët e para të IPKO Superligës në Kosovë, ka siguruar vetëm 6 pikë.
Pikërisht për këtë arsye, pas barazimit pa gola në transfertën ndaj Ballkanit, ishin hedhur dyshime edhe mbi të ardhmen e trajnerit peqinas, Gugash Magani, në stolin e skuadrës nga Mitrovica.
Gjithsesi pasditen e djeshme u mblodh edhe kryesia e klubit Trepça ‘89, e cila vendosi të konfirmojë besimin ndaj trajnerit Gugash Magani, me shpresën se skuadra do ta kalojë shpejt këtë moment të vështirë.
“Pas mbledhjes së mbajtur, Kryesia e Klubit ia beson vazhdimësinë e punës Trajnerit, Profesor Gugash Maganit, duke shpresuar se do të kalojmë këtë krizë momentale dhe do t’i kthehemi rezultateve pozitive”, thuhej në komunikatën e kryesisë së klubit të Trepçës, firmosur edhe nga presidenti i skuadrës.
Fundjavën e ardhshme, Trepça ’89 do të presë në stadiumin olimpik “Adem Jashari” skuadrën e sapongjitur në Superligën e Kosovës, Ferizajn, në një sfidë ku trajneri Magani do të tentojë të rikthejë skuadrën te suksesi, që do të sillte qetësi.
