U rikthye në Itali, Pogba mbron Serie A: Me Premier League diferenca vetëm ekonomike!
Me kalimin e viteve futbolli italian ka humbur shumë nga shkëlqimi i dikurshëm, kur në Serie A aktivizoheshin lojtarët më të spikatur të Europës. Problemet ekonomike kanë ndikuar sigurisht, me Premier League që tashmë ka marrë stafetën dhe konsiderohet si kampionati më spektakolar i Europës. Megjithatë, për Paul Pogba që këtë sezon braktisi Premier Leaguen dhe Manchester United për t’u rikthyer te Juventus, kampionati italian mbetet i një vështirësie maksimale.
“Është e vërtetë që kampionati anglez është shumë tërheqës, por kampionati italian mbetet një nga më të vështirët. Të fitosh në Itali është gjithnjë një sfidë e madhe dhe të luash në Serie A nuk është asnjëherë e lehtë. Për Juventusin fitorja në Itali është edhe një sfidë më e madhe se ekipet e tjera pasi pritet gjithnjë maksimumi.
Në këtë moment, Premier League ka potencial ekonomik të pakrahasueshëm me kampionatet e tjera dhe klubet angleze e kanë më të lehtë të transferojnë lojtarë se ato italianet. Mendoj se kjo është diferenca e vërtetë, por nëse bëhet fjalë për futbollin në fushë për mua ai italiani mbetet një nga më të mirët në botë pavarësisht gjithçkaje”, tha Pogba.
