UEFA mbyll hetimet për PSG-Basaksehir: Nuk bëhet fjalë për racizëm
UEFA ka përfunduar hetimet për incidentin e ndodhur në ndeshjen mes Paris Saint Germain dhe Basaksehir, e cila u ndërpre me pretendimin se arbitri i katërt, rumuni Sebastian Coltescu kishte përdorur shprehje raciste ndaj zëvendës-trajnerit të klubit turk.
Në një moment tensioni, teksa Achille Webo po protestonte, arbitri Coltescu e referoi te gjyqtari kryesor, duke përdorur termin “ky i ziu”, çka solli reagim të ashpër dhe futbollistët e të dy skuadrave braktisën ndeshjen, për ta vijuar të nesërmen.
UEFA ndërhyri duke zëvendësuar trupën e arbitrimit dhe premtoi se do të hetojë me imtësi situatën, por tani doli në përfundimin se referimi “ky i ziu” në gjuhën rumune, nuk kishte konotacion negativ.
Pikërisht për këtë arsye, qeveria europiane e futbollit doli në konkluzionin se nuk kemi të bëjmë me një rast të shprehjes së racizmit, ndaj nuk mori asnjë masë disiplinore ndaj arbitrit rumun Sebastian Coltescu.
