Uzuni 14 minuta përballë Ronaldos, fitojnë Barça, Dortmundi dhe Chelsea
Murto Uzuni përballë Cristiano Ronaldos! Nuk është thjesht ëndërr, por realiteti i mbrëmjes së Championsit. Sulmuesi i Kombëtares Shqiptare, i cili vetëm një ditë më parë u kthye në stërvitje me Ferencvarosin, pasi mposhti Koronavirusin, u aktivizua në minutën e 80-të (rezultati ishte 0-3) ndaj “Zonjës së Vjetër” dhe për 14 minuta u përpoq të bënte të tijën si kundërshtar i pesë herë fituesit të Topit të Artë. Ferencvarosi, në minutën e fundit shënoi me Boli, por kishte pësuar 4 gola deri në minutën e 81-të: dy herë kishte realizuar Morata, një gol mban firmën e Dybalas dhe i katërti ishte autogol i Dvali.
Fiton edhe Barcelona, 2-1 përballë Dinamos së Kievit, e cila tentoi deri në sekondat e fundit të merrte një rezultat pozitiv në “Camp Nou”. Messi realizoi golin e parë e 11-metërsh në minutën e pestë, ndërsa Pique dyfishoi në të 65-ën. Golin e vetëm për skuadrën ukrainase e realizoi Tsygankov.
Chesea iu imponua 3-0 Rennes me dygolësh të Timo Werner dhe finalizimin e Abraham, me të njëjtin rezultat, 3-0, Dortmundi fitoi në fushën e Club Brugge, ku spikati Haaland me dy gola (golin e parë të sfidës e shënoi Torgen Hazard).
PSG shpërdoron epërsinë 1-0 por edhe një 11-metërsh nga Di Maria përballë Leipzigut, që fitoi me përmbysje 2-1 me gola të Nkunku dhe Forsberg, duke zhvlerësuar rrjetën e Di Marias që në minutën e 6-të. Parizienët e mbyllën me 9 lojtarë sfidën, pasi Gueye dhe Kimpembe morën nga dy të verdha.
Përmbysje e jashtëzakonshme 3-2 e Sevillas përballë Krasnodarit. Skuadra Ruse udhëhiqtë 0-2 deri në fundin e pjesës së parë, kur Rakitic shënoi të parin për vendasit. Kartoni i kuq i Navasit ua bëri më të vështirë punën andaluzëve, që gjithsesi mes sakrificave arritën të shënon dy herë me të njëjtin autor, En Nesiry, për të siguruar një fitore të madhe.
