VIDEO/ Leao-Theo “shtypin” Atalantën, Milani një pikë larg titullit
Milani kalon edhe pengesën Atalanta, dhe tani ndodhet vetëm një pikë larg titullit kampion, që do ishte i 19-ti në historinë e klubit të famshëm. Kuqezinjtë mposhtën 2-0 ekipin e Gasperinit (Berat Gjimshiti titullar) në javën e parafundit në Serie A. 75 mijë tifozë kuqezi krijuan një atmosferë të shkëlqyer në “San Siro”.
Ata mbështetën ekipin dhe shijuan fitoren e pestë radhazi, që u vulos në fraksionin e dytë të sfidës. Rafael Leao ndezi stadiumin në minutën e 56-të pas një asisti nga Messiah. Portugezi la pas në garën e shpejtësisë Koopmeiners dhe nuk gaboi përballë Mussos, duke zhbllokuar një sfidë të komplikuar.
Goli numër 11-të në kampionat për golashënuesin më të mirë të ekipit kryesuese. Më pas Theo Hernandez “show”. Anësori i majtë mori një top nga Krunic, “shtypi turbon”, dribloi ata që i dolën përpara dhe shënoi një gol të paharrueshëm. Festë e madhe e lojtarëve të Milanit dhe “San Siro” në ekstazë!
Pas atij goli nuk mund të shënoheshin të tjerë, dhe sfida përfundoi 2-0 për djemtë e Stefano Piolit. Tani mjafton një pikë ndaj Sassuolos në javën e fundit për të pikturuar titullin kuqezi pas 11 vitesh. Ndërkohë, festa mund të nisë sonte në mbrëmje nëse Interi nuk fiton përballë Cagliarit në ishull.
