VIDEO/ Njëri gol më i bukur se tjetri, Mirlind Daku pa rivalë në Slloveni
Mirlind Daku ndodhet në formë fantastike. Sulmuesi dardan ishte protagonist absolut në fitoren 3-0 të Murës përballë Radomlje në kampionatin slloven të futbollit. 24-vjeçari nga Gjilani, autor i pesë ndeshjeve me përfaqësuesen e Kosovës, tundi rrjetën kundërshtare falë dy realizimeve shumë të bukura.
Në fillim zhbllokoi rezultatin në minutën e tretë, moment ku tregoi gjithë aftësitë e tij si bomber, ndërkohë që 16 minuta përpara fundit vulosi triumfin me “tris” të Murës. Daku kreu një driblim të bukur në zonën kundërshtare, mposhti për të dytën herë portierin e Radomlje dhe nisi festën me shokët e ekipit.
Ish-sulmuesi i Kukësit në Superiore, është ngjitur në kuotën e 10 golave në kampionat, duke kryesuar i vetëm renditjen e golashënuesve me tre gola më shumë Kotnik (Koper). Sulmuesi potent shpreson të marrë sërish një ftesë nga Kosova.
Në një prononcim për emisionin “Koha Shtesë” në SuperSport më 2 tetor, Daku deklaroi: “Nuk më ka kontaktuar askush nga FFK (Federata e Futbollit të Kosovës), përkundër formës të mirë. Nuk jam shumë i zhgënjyer, vetëm sa më rritet edhe më shumë motivi për të punuar dhe luajtur mirë.
Në grumbullimet e radhës unë pres ftesë nga Kosova, dhe nëse nuk më ftojnë, unë gjithmonë do të jem tifoz i tyre. Nuk mundem ta detyroj askënd të më ftojë, dhe nuk do të luaj për asnjë shtet tjetër përveç Kosovës, andaj pres në çdo moment ftesën nga Kosova”, deklaroi goleadori dardan.
