VIDEO/ Uzuni i papërmbajtshëm, dopieta e sulmuesit “kuqezi” i dhuron fitoren dhe kreun Granada-s
Myrto Uzuni është kthyer në një protagonist të padiskutuar te Granada, me sulmuesin “kuqezi” që në gjashtë javë kampionat ka realizuar 6 gola.
Granada fitoi me rezultatin 2-1 ndaj Mirandes në një ndeshje që e dominoi të gjithën, me Uzunin që ndezi festën në “Estadio Nuevo Los Carmenes”.
Shqiptari zhbllokoi sfidën në minutën e 44’, me një super gol pas asistit të dhënë nga Callejon. Më pas miqtë gjetën barazimin me Raul në minutën e 48’.
Sulmuesi “kuqezi” nuk u ndal me aq dhe sërish me një asist nga Callejon gjeti për të dytën herë rrugën drejt rrjetës në mbrëmjen e kësaj të shtune në minutën e 75′.
Pas shpalljes si golashënuesi i muajit gusht në La Liga 2, Uzuni është duke parë një ecuri shumë të mirë edhe në shtator, ndërsa u shpall lojtari më i mirë i sfidës së kësaj të shtune.
Pas mbylljes së raundit të gjashtë të La Liga 2, Granada kryeson me 12 pikë, teksa Mirandes renditet në vend të fundit me vetëm 2 pikë.
