Vllaznia harron humbjen në kryeqytet, ndaj Teutës fitorja është detyrim
Disfata në derbin e Shqipërisë e bëri Vllazninë të humbë paksa terren me kreun e renditjes, pas disa javëve ku kishte bindur në lojë dhe rezultate.
Me Tiranën, për lojën që zhvilloi, ekipi kuqeblu nuk meritonte të humbiste dhe rastet madje i pati për të fituar, edhe pse ndeshja kryesisht ishte tejet e kujdesshme nga të dyja ekipet, por dhe deklarata e Brdaric pas sfidës se këtë herë zotat e futbollit nuk ishin me ekipin e tij, ishte deri diku një tregues.
Me vetëm një goditje në portë fitoi Tirana dhe për Vllazninë kjo humbje solli edhe përfshirjen e një tjetër rivali në garën e titullit. Megjithatë më tepër se rezultati peshon loja, që duket se është e qëndrueshme te shkodranët, pasi në fazën e tretë pasi disa luhatje.
Kjo është ajo që bën të ndihen optimistë në Shkodër, edhe për faktin se gjithçka e kanë vetë në dorë duke marrë në konsideratë përballjet direkte, që në një kampionat ku luftojnë të gjithë për gjithçka, edhe një hap fals mund të mos përbëjë fundin e botës.
Ndaj Teutës gjithsesi duhet fitorja këtë herë dhe te Vllaznia e kanë të qartë, pasi në të kundër terreni i humbur për shkak edhe të kalendarit të rivalëve të tjerë, mund të bëhet i parikuperueshëm me javët e mbetura në dispozicion.
