Vllaznia prezanton trajnerin gjerman Brdariç dhe ndihmësit e tij shkodranë
Ashtu siç pritej, Vllaznia ka prezantuar sot trajnerin e ri, që do të jetë gjermani me origjinë kroate, Thomas Brdariç. Ky i fundit ka mbërritur në Shkodër prej disa ditësh dhe ka diskutuar për të gjithë detajet me drejtuesit e klubit, për të hedhur më pas firmën mbi kontratë.
Trajneri Brdaric u prezantua nga drejtori sportiv Matko Djarmati, i cili bëri edhe përkthimit e 45-vjeçarit në konferencën për shtyp, ndërsa u prezantuan gjithashtu edhe stafi ndihmës i teknikut gjerman.
Kështu ndihmësi i tij i parë do të jetë ish trajneri i Besëlidhjes Elvis Plori, ndërsa stafi do të kompletohet nga Safet Osja dhe Ideal Lekiqi, me këtë të fundit si trajner i portierëve të Vllaznisë.
“Jam i kënaqur që do të jem pjesë e Vllaznisë. Shpresojmë të arrijmë objektivat që ka klubi për të kapur Kupat e Europës. Kam disa ditë në Shkodër dhe kam parë gjithçka sa i përket klubi, terreneve. Uroj që bashkëpunim të jetë sa më i gjatë dhe i suksesshëm. Iu përgjigja pozitivisht ftesës së një klubi me emër si Vllaznia. Tani duhet t’i futemi punës, pasi skuadra ka nevojë për përforcime”, është shprehur trajneri Brdaric në konferencën për shtyp.
