Zyrtare/ Reali “hakmerret” ndaj PSG-në, firmos për 6 sezone me mesfushorin francez
Aurelien Tchouameni ka zgjedhur të transferohet te Real Madridi, në vend të Paris Saint-Germain, që po ashtu ishte në garë për shërbimet e 22-vjeçarit.
Një “hakmarrje” kjo e madrilenëve ndaj parizienëve, pas skemës së ndodhur me Kylian Mbappen, që “Los Blancos” kishin rreth një vit që e ndiqnin dhe që në fund rinovoi me PSG-në.
Në një postim në rrjetet sociale, Reali bën me dije se francezi i është bashkuar ekipit të tyre për plot gjashtë sezone.
“Real Madrid dhe Monaco kanë rënë dakord për transferimin e lojtarit Aurelien Tchouameni, i cili do të jetë i lidhur me klubin për gjashtë sezonet e ardhshme. Të martën e ardhshme, më 14 qershor, në orën 12:00 do të bëhet ceremonia e prezantimit të Aurelien Tchouameni si lojtar i ri i Real Madridit pas ekzaminimit mjekësor.”-shkruhet në postimin e Realit.
Në Madrid, Tchouameni shihet si pasuesi ideal i Casemiro-s, pasi 22-vjeçari ka të gjitha cilësitë që madrilenët kërkojnë, ndërsa në këtë sezon, mesfushori ka luajtur 39 ndeshje në të gjitha kompeticionet dhe ka shënuar 2 gola.
